امنتك الله حبيبي لا تخلينـي!!!

يضيق بالي من الفرقـى وطاريهـا
ويرتاح بالي بشوفك يا نظر عينـي

اشغلت فكري حبيبـي وش تواليهـا
وفي غيبتك دمعة الحرمان تشقينـي

امشي مَعَ الناس لكن دون ما اوحيها
واشلون ابنساك وطيوفك تخاوينـي

إليا طرى أسمك دموع العين اغطّيها
خوفي من العاذل اللّي مـا يدانينـي

وإليا طرت لي وصوفك جل باريهـا
من فيض زينك تـوزّع للمزايينـي

تسبى النواظر بنعس اهداب تسبيها
ومن بسمتك تخطف قلوب الملاييني

يا مهجة الروح روحي كيف تشقيها
صمتك ذبحني ونار الشوق تكوينـي

اقرى الرسايل لأجل نفسي اسليهـا
وأثر الرسايل عقب عينـك تعنينـي

ما باقي الاّ طيور الـورق الآحيهـا
اذكر بها احلى الليالي يوم تغلينـي

بعت المحبه من اول كنت شاريهـا
وعلى الوصل والموده كنت توصيني

ماتت ورود الغلا ماعـدت ترويهـا
ماتت سبب قسوتك يا نازح البينـي

حتى العهود القديمه صرت ناسيهـا
ولاعاد باقي سوى الذكـر تقدينـي

زادت جروحي ولا غيـرك يداويهـا
ليتك تشوف الخفايا كـان تبكينـي

ضاقت علي الوسيعه مَـعْ مبانيهـا
اطوي سنين الرجا واقول يا وينـي

قلبي يحبك وعينـي ساكـن ٍ فيهـا
لاتنخـدع بالعـواذل والشياطينـي

في روض قلبي ورودك ليت تسقيها
تعال واسقي ورود الحب واسقينـي

جاتك حروف الشّعر من قبل اسميها
دوّر عبـاره تواكـب للمضامينـي

مشاعر ٍ ما تبي يـا كـود غاليهـا
وامنتك الله حبيبي لا تخلينـي ..!!



سلامتكــــــم

يعطيك الف عافيه ع الطرح
الرائع الذوق الرفيع في الاختيار

تحياتي... سراب الروح